Dáiddadálu leaba ásahan dáiddár/girječálli Máret Ánne Sara ja koreográfa/filbmadahkki Elle Sofe Sara. Soai leaba goappašagat bajásšaddan ja orruba Guovdageainnus, ja leaba máŋggaid jagiid bargan dáiddasuorggis. Dáiddadállu lea šaddan dan sivas go lei sávaldat nannet dáiddabirrasa Guovdageainnus ja muđui Sámis. Guovdageainnu suohkan juollodii vuosttaš doarjaga geahččalanprošektii ja nu duohtandahkkui Dáiddadállu 2014.