Áhkošguovtto oktavuohta lei dehálaš bargui

Ánne Kátjá lea govvejeaddji ja filbmadahkki, ja bargá maiddái Dáiddadálus. Son lea ovttas filbmarešisevrrain Grete Andrea Kvaalain ráhkadan oanehisfilmma mii dál viimmat ja stuora iluin čájehuvvo dáppe Guovdageainnus. Kvaal lea govvejeaddji ja filbmadahkki. 1980-logus loahpas son čuvvodii Ánne Kátjá áhku, Árdnen Niillasa Karen Anna ja su siidda, govvendihte sin árgabeaivvi boazodoalus.

Čájáhusas leat Kvaala govat jagiin 1986-1993 Karen Anna ja su siida prošeavttas, ja oanehisfilbma filbmejuvvon 2020:s. Fárrolaga filbma ja govat dievasmahttet áigegova mii čájeha kultuvrra rievdama, dokumenteren mii sáhttá šaddat divrrasin maŋit áigái.

Golbma jagi áigi oahpásmuvai Grete Ánne Kátjáin ja jearai eaba go soai ráhkat filmma Karen Anna birra:

– Lea somá ovttasbargat Ánne Kátjáin. Vaikko letne goabbat buolvvas ja kultuvrrain bajasšaddan, de fuomášeimme dávjá ahte goitge jurddašeimme seammaladje filmma dáfus ja ovttasráđiid barggaime filmma ovdanemiin. Son leage maid čájáhusa váldoolbmo áhkkut, ja lei maid studeantan TV-skuvllas. Nu šattai ge lunddolaš Ánne Kátjá jearrat ovttasbargoguoibmin. Ánne Kátjá máhttu filbmamáilmmi birra ja su oktavuohta Karen Annain attii oadjebasvuođa mii lei deŧalaš bargui. Šaddá maid somá Guovdageidnui fas vuolgit. Mu govat eai leat čájehuvvon doppe loahpa 1980-logu rájes, muitala Kvaal.

Illuda buktit čájáhusa ruoktot

Filbma ja govvačájáhus lea jagi johttán Davvi-Norggas, ja viimmat boahtá Ánne Kátjá ruovttubáikái. Son illuda čájehit filmma gili olbmuide:

– Lean nu ilus go Dáiddadállu lea bovden munno čájáhusa Guovdageidnui. Dáiddadálu bokte mis dáidda – ja kreatiiva bargiin lea fágalaš orgána ja birás mii bargá earret eará ruhttademiin, plánemiin ja čađáhemiin. Lea maid hui somá leat dán prošeavttas. Vuosttažettiin lei hui earenoamaš filbmet iežan áhku gii lea nu divrras munnje ja maid mu ovdagovva. Dasto bargat Gretiin ja su čájáhusain mas leat govat mu bearrašis ja orohagas. Gal Grete lei ruovdi mii čuvvodii áhku ja min siidda boazobargguid birra jagi, máŋga jagi! Son lea bargan máilmme deŧalaš barggu dokumenteret boazosápmelaččaid ja boazodoalu, ja mun lean hui rámis go beasan suinna bargat, muitala Ánne Kátjá.

Čájáhusrahpan

Čájáhus rahppasa Diehtosiiddas ja Guovdageainnu gilišilljus 15.10.21. Prográmma:

Bearjadaga 15.10:
Dii. 18: Govvačájáhus rahpan Guovdageainnu gilišilljus

Dii. 19:30: Filbmačájáhus Diehtosiiddas ja ságastallan

Bures boahtin!