Álggaheaba kulturstudio Guovdageidnui
Min dáiddárguoimmit Ánna-Katri Helander ja Anthoni Hætta leaba huŧkát ja barggánat. Ovddit vahkkoloahpa lei “FÁRUS” nammasaš prošeavttas vuosttaščájáhus, prošeakta man soai leaba hábmen ovttas Inger Johanne Oskalin. FÁRUS lea dáiddaprošeakta Guovdageainnu nuoraid váste, ja prošeavttas lei maid mielde Andreas Leonardsen. Prošektii serve olu nuorat. – Mii álggiimet skábmamánus ja leat hárjehallan juohke vahkku dan rájes. Mii leat bargan musihkain, dánsain, filmmain ja teknihkalaš rustegiin, muitaleaba soai.
Ánna-Katri ja Anthoni leaba dovdan ahte Guovdageainnus leat áiggiid čađa váilon bistevaš dáiddalaš fálaldagat mánáide ja nuoraide, ja dan soai háliideaba rievdadit, ja movttiidahttit nuoraid oahpásmuvvat iežaset dáiddalaš beliiguin.
-Niehku lea váikkuhit kultuvrralaš eallima mánáid ja nuoraid gaskkas Guovdageainnus, vai mánát dáppe bajasšaddet rámisvuođain, ja ahte mis leat seamma olu ja buorit fálaldagat dáppe go gávpogiin, muitala Anthoni, ja Ánna-Katri lasiha:
– Moai letne maid goappašagat mánnán dovdan iežame “outcast:an”, ja dáidaga bokte letne beassan dalle juo dovdat friddjavuođa ja gullevašvuođa. Duostan čuoččuhit ahte moai dihte iežame vásáhusaid vuođul man dehálaš oassi dáidda sáhttá leat nuorravuođaáiggis.
Davvi Divison AS
Guokte jagi áigi álggii sunno ovttasbargu, dál leaba ásahan oasusfitnodaga ja ráhkadeame studio.
– Munno ođđa studios, Davvi Division, galget leat bistevaš fálaldagat buohkaide: mánáide, nuoraide, studeanttaide, rávisolbmuide jnv. Dohko fárre maid Lounge Sápmi ja feara mii sáhttá lágiduvvot munno ođđa studios. Davvi Divisionis galgá leat vejolaš oahppat čuojahit piano, rumbbuid ja oahppat lávlut. Jus háliidat joavkkus oahppat čuojahit, de lea vejolaš dan maid dahkat. Dánsuma oktavuođas háliidetne rávisolbmuide maid fállát vejolašvuođa oahppat áibbas álgodási lihkastagaid ja dánssaid, juoga mii lea maid hui somás hárjehallan vuohki, muitala Ánna-Katri.
Anthoni lasiha:
– Munnos lea bargomorála seamma dásis ja háliidetne čadahit áššiid ja letne barggánat goappašagat, ja danne leage munnos nu buorre ovttasbargu. Moai háliidetne loktet sámi nuoraid iešdovddu, ja dan ovdii moai barge hui garrasit.
