Konferánssa fáttát leat hui oahppásat Dáiddadállui ja háliidit ge dákko bokte loktet fáttáid mat ledje eanemus áigeguovdilat midjiide juste dál. Dáiddadálu mielas lea digáštallan sámi dáiddaárvvoštallamis hui dehálaš, maid kultursuorgi Sámis galggašii joatkit ovdánahttit. Mii vásiheimmet ahte lea stuorra ovttaoaivilvuohta sámi dáiddaárvvoštallama dárbbus, nappo ledje olu buorit oaivilat ja evttohusat mat bohte ovdan digáštallamis. Dát fáddá lea áigeguovdil Dáiddadállui go duos dás vásihit dáiddaárvvoštallamiid go min iežamet dáiddárguoimmit čájehit dáidagiiddiset.

Nubbi digáštallan sámi institušuvnnaid gelbbolašvuođa- ja kapasitehtahuksemis lea fáddá mainna Dáiddadállu joatká bargat viidáseappot. Internášonaliseren, eksporta ja kapasitehtahuksen gullá min beaivválaš bargui. Min mielas lea hui dehálaš vuosttažettiin nannet ovttasbarggu sámi institušuvnnaid gaskkas, seammás go ovttasbargat eará eamiálbmot guovlluiguin. Ovttasbargguiguin sáhttit viežžat gelbbolašvuođa maid ieža sáhttit dasto ávkkástallat. Dáiddadálu internášunáliseremis mii bargat vuostamužžan dáiddárguimmiideamet čalmmustahttimiin, ja rahpat sidjiide veahkkin uvssa olgoriikka márkanii. Dán barggu bokte leat mis máŋga dáiddára geat álggos leat lihkostuvvon internášunála dásis ja easka maŋŋil nášunála dásis.

KulturSámi maŋemuš konferánssa beaivvis Dáiddadállu ovdanbuvttii doaimmaidis birra, fárrolaga eará sámi kulturinstitušuvnnaiguin; Viermie K ja Verdde. Mii beasaimet maid almmuhit Dáiddadálu ođđaseamos dáiddárguoimmi, Hildá Lænsman, gii čájehii iežas ođđaseamos musihkkaprošeavtta.