Dáiddadállu gokča uvssaid gaskaboddosaččat
Dáiddadállu lea ássan Guovdageainnu Bargoguovddážis dan rajes go dáiddakollektiiva ásahuvái 2014s. Dál dáiddárat guđđet visti ja giddejit gaskkaboddosaččat uvssaid dassa gávdnet eara visti.
– Mis nohka dehálaš áigodat mii álggii čieža jagi áigi, buriin ovttasbargguin Guovdageainnu suohkanin ja Guovdageainnu Bargoguovddážin. Lea veahá váivi, muhto seammás álgá gelddolaš boahtteáigi, dadjába beaivválaš jođiheaddji Dine Arnannguaq Fenger Lynge ja stivrajođiheaddji Máret Ánne Sara guhte bearjadaga lássiiga uvssaid dološ boarrasiid siiddas maŋemuš geardde.
Gaskkaboddosaččat ruovttukántuvrras
– Mii eat mange láhkai bisán doaibmamis. Mii bargat ain min dáiddáriid ja dáidága ovddas, sihke gelbbolašvuođaloktemiin, fierpmádatbargguin, iežamet prošeavttaiguin ja ovttasbargguiguin. Áidna mii rievdá, lea ahte mii massit gaskkaboddosaččat fysalaš bargosaji ja deaivvadanbáikki, ja nu mii doaimmahit buot bargguid ruovttukántuvrrain. Dákkár dilalašvuohta dieđusge bágge min jurddašit ja bargat earaládje ja sáhttáge nu buktit miellegiddevaš višuvnnaid ovddasguvlui. Allá láigoloktaneapmi dagahii ahte mii guođđit Guovdageainnu bargoguovddáža. Mii leat dássážii máksán heivvolaš láiggu, muhto mii eat oainne govttolažžan bidját vel eambbo ruđá boares vistái mas leat váilevašvuođat ja mii ii heive šat nu bures Dáiddadálu doaimmaide, čilge Máret Anne Sara, dáiddár guhte álggahii Dáiddadálu.
Máret Ánne Sara. Photo: Marie Louise Somby/Árvu
Bargame ođđa čovdosin
Dáiddadállu nu movt mii dássážii leat gávdnon ja doaibman, jávká gaskkaboddosaččat Guovdageainnu suohkanis.
– Mátkeealáhusat, oahpahusinstitušuvnnat, dáidda- ja kulturásáhusat ja suohkan ieš, dávjá ohcalit mis gelbbolašvuođa ja ovttasbarggu. Dál šaddá dieđus váddát deaivvadit iežamet dáiddáriiguin ja earáiguin go mis ii leat šat visti, muhto Dáiddadállu lea bargame gávdnat ođđa ja buoret čovdosa, dadjá Dine Arnannguaq Fenger Lynge.
Áigot cegget iežaset vistti
– Mii leat bargame stuora prošeavttain mas guorahallat vejolašvuođaid cegget ođđa Dáiddadálu iežamet dárbbuid vuođul. Dat lea ádjás bargu ja dassái go duohtandahkko, de šaddat mii ain láigohit alcceseamet visti. Dáppe Guovdageainnus leat unnán vistit mat heivejit min dárbbuide, muhto mii leat gulahallame mottiin láigoheddjiin. Go vuos leat váldán lávkki ahte fárret eret dan vistis mas dássážii leat leamaš, de bargat dan ovdii ahte ásahit dáiddáriidda buoret bargovisti ja dáidagiidda buoret ja eambbo geasuheaddji čájehanbáikkii. Mii illudit Dáiddadálu boahtteáigái, dadjába Dine Arnannguaq Fenger Lynge ja Máret Ánne Sara.
