Dáiddadálu dáiddárat TIFFai
Tromssa Internašunála Filbmafestivála lea beakkán filbmafestivála mas fitnet sihke báikkálaš, nášunála ja riikagaskasaš guossit. TIFF lágiduvvui vuohččan jagi 1991:s. Ovdditjagi, 2019, ledje oktiibuot 58 320 geahččit festiválas. Lea šaddan measta dáhpin ahte Dáiddadálu dáiddarat devdet osiid TIFF prográmmas, ja nu šaddá ge dál maid. Golmmas Dáiddadálus vulget dán jagaš Tromssa Internašunála Filbmafestiválii.
“Nu guhka go mis leat bohccot dáppe, de sáhttit mii ge eallit dáppe.”
Elle Márjá Eira lea filbmadahkki, musihkar ja lávlu. Son lea buvttadan máŋga oanehisfilmma ja bargan iešguđet musihkkaprošeavttaiguin, earret eará filmmas “Den 12. mann” ovttas komponistain Christophe Beck:ain. Elle Márjjá filmma nammá lea “Ealát”, ja filmmas čuovvut Elle Márjja ja su bearraša eallima boazodoalus.
– Ealát lea vuostaš (guhkibuš) filbma maid lean ráhkadan gos ieš lean sihke ovddabealde ja maŋabealde kamera, nu ahte lea sihke erenoamaš ja veahaš issoras. Lean gal musihkkavideoaid ráhkadan gos ieš lean sihke ovddabealde ja maŋabealde kamera. Lea leamašan hastaleaddji leat sihke váldoolmmoš ja rešissevra danne go mii han leimmet váttis dilis duo giđđat goavvejagi geažil, muitala Elle Márjá.
TIFF šaddá digitálan
– Lea hui buorre ahte TIFFa lágiida digitala festivala vaikko mun váillahan leat kinos. Mun dieđusge jurddašan ahte geahččat filmma digitala hámis ii atte dan seamma vásáhusa ja dovddu go kinos. Illudan goit aŋkke ahte mus lea dál filbmapremiera ja ahte viimmat beasan čájehit filmma, loahpaha son.
Ealát filmma vuosttaščájáhus lea bearjadaga 22.1.21 diibmu 16:00 TIFF neahttasiidduin. Dáppe gávnnat bileahta:
Filbmaságastallan
Elle Sofe Sara lea filbmadahkki ja koreográfa, ja leage álgán bargat iežas ođđa guhkesfilmmain “Árru”. Elle Sofe galgá TIFFas ságastallat iežas filmma birra earret eará ovddeš festiválajođiheddjiin Martha Otte:iin.
– Mun illudan searvat filbmafestiválii. Šaddá buorre oaidnalit filbmaolbmuiguin fas ja juogadit mu vuosttaš spillefilmma bargguid, muitala Sara.
Ságastallan sáddejuvvo njuolgga TIFF neahttasiidduin lávvordaga 23.b dii. 12 rájes.
Filbmataleantat deaivvadit fas
– Diibmá dán áigge almmuhuvai ahte mun ledjen válljejuvvon MERFILM ja Talent Norge filbmataleanta prográmmii. Dál galgat deaivvadit fas ja humadit min filmmaid bargoproseassaid birra. Šaddá hui somá ja miellegiddevaš gullát maid dat earát barget. Ja lea ge vel ovddeš festiválajođiheaddji Martha Otte gii jođiha ságastallamiid, mii lea hui buorre, dadjá Elle Sofe.
Ságastallama sáhttá maid Facebook bokte geahččat: deaddel dán.
“Postkapitalistisk arkitektur-TV vol4@ TIFF” Govven: Ken Are Bongo
Ken Are Bongo lea Dáiddadálu dáiddárguoibmi, filbmabuvttadeaddji ja govvejeaddji, ja bargá maiddái Sámi beassášfestivála jođiheaddjin. Son lea buvttadan olu filmmaid ja tv-ráidduid, earret eará filmma Ealát ovttas Elle Márja Eirain.
Boazu mearridii filbmema
– Ean diehtan goassege goas ja man guhka galggaime ain filbmet. Ovdamearkka dihte sáhtii okta filbmenbeaivi rievdat ja bistit máŋga beaivvi danne go čuovuime Elle Márjjá ja su bearraša ja bohccuid, sin eavttuid vuođul. Šattai álo leat gearggus sihke beaivebottu filbmet, muhto maid olles vahkku. Munnos Elle Márjjáin lea hui buorre ovttasbargu álo leamašan. Mun luohtan su mearrádusaide, ja son fas mu, muitala Ken Are.
“Postkapitalistisk arkitektur-TV vol4@ TIFF”
Ken Are lea ovttas Joar Nangoin ráhkadan TV-ráiddu TIFFai. Soai guorahallaba fáttáid nu movt oktavuođadovddu, gullevašvuođa ja ruovttut. Golbma oasi ráiddus almmuhuvvo tiff.no dán vahkku mielde. Bearjadaga 22.1 loahpahuvvo bargu liveshowain Romssa Stortorgas. Doppe ságastallaba Ken Are ja Joar iežaska barggu birra.
– Ean dieđe riekta movt munno sátta šaddá. Moai galge goit čájehit munno ráiddu ja hupmat dan barggu birra, ja de vel musihkka ja dánsun, nu ahte šaddá hui somá, dadjá son.
