Ann-Sofie illuda

-Illudan earret eará searvat Šoop Šoop:ii, go doppe oažžu vejolašvuođa olahit olu sisaosttiide Norggas ja maiddái ránnjáriikkain. Muđui vuorddán lagaš oktavuođa jođiheddjiiguin, ja buori ovttasbarggu Faamoe joavkkuin. Ferte dieđusge ieš maid bidjat olu návccaid ovdánahttit iežas fitnodaga.

Fitnodatovdanahttinprográmma bistá jagi ja sisttisdoallá earret eará deaivvademiid ja webináraid. Fitnodagat geat leat prográmmas galget maid searvat Šoop Šoop – Sámi Duodji ja Design Days mat lágiduvvot boahtte jagi.

Ođđaáigásaš sámi duojit

Ann-Sofie lea duojár ja lea sámi duodjeoahpu gazzan Samernas Utbildnings Centrum Johkamohkis. Lea maid oahppan inšenevran “Innovasjon og Design” fágas Kungliga Tekniska Høgskolan Stockholmas. Son duddjo ođđaáigásaš sámi dujiid ja lea máŋga jagi vuovdán buktagiid iešguđet rámbuvrrain ja márkaniin nu movt Johkamohki márkaniin.

– Mearkkaša olu oažžut doarjaga čeahpes olbmuiguin geat veahkehit ovdánahttit mu. Mun lean akto iežan fitnodagas, ja muhtomin han sáhttá dovdot ahte lea dego mierkká siste vázzime. Lea hui buorre oažžut veahki hárjánan olbmuiguin. Lea sulli seamma go Dáiddadálus. Dáiddadállu lea kollektiiva dáiddáriidda ja sii leat hui čeahpit áŋgiruššat prošeavttaide mat bohtet buorrin sihke Dáiddadállui ja maid juohke dáiddarii. Mearkkaša hui olu leat oassin Dáiddadálus.