EadnámetMaid sirdojuvvo nehttii
Covid-19 vuohon goazaha dáidda ja kultuvra suorggi. Dáiddadálu “EadnámetMaid” nammasaš deaivvadeapmi galggai čohkket akadmia, dáidagiid, jurdagiid ja olbmuid Guovdageidnui ja Mázii 5.-8.11. Otná Covid-19 dili geažil leat mearridan unnidit ja digitaliseret osiid EadnámetMaid prográmmas. Eará osiid maŋidit nuppe jahkái.
– Mii váldit ovddasvastadusamet servodaga ektui ja guldalit Guovdageainnu suohkana ávžžuhusaid. Danne leat mearridan ahte dál ii leat rievttes áigi čađahit ná stuora deaivvadeami. Lihkká eat hálit vuollanit ja bissehit buot man ovddas leat bargan dán dehálaš fáttá ektui. Mii čuovvut buot njoammuneastadan njuolggadusaid ja gávdnat baicca eará čovdosiid vai sáhttit fállat deŧalaš fágalaš sisdoalu gehččiide ja dáiddariidda, dadjá Dáiddadálu beaivválaš jođiheaddji, Dine Fenger Arnannguaq Lynge.
Lágideaddjit: Maren Benedicte Storslett, Dine Arnannguaq Fenger Lynge ja Ánne Kátjá Gaup.
Streamejuvvo, dulkojuvvo ja nuvttá buohkaide
Gáržžiduvvon prográmma streamejuvvo neahta bokte skábmamánu 5.-6.b. Prográmma dulkojuvvo davvisámegillii ja eŋgelasgillii “Interactio” nammasaš dulkanprográmma bokte, ja dan sáhttá vurket telefuvdnii. Neahttaliŋka almmuhuvvo Dáiddadálu Facebook siidui ja neahttasiidui. Streama lea nuvttá gehččiide.
Luonddu illásteapmi ja psyhkalaš dearvvašvuohta
EadnámetMaid lea deaivvadeapmi gos dáidda ja ságastallan lea guovddážis. 2019:s, SápmiToo deaivvadeamis, humaimet sohkabealrollaid, veahkaválddálašvuođa ja seksuála illasteami birra. Dán jagi oaidnit dárbbu hupmat veahkaválddálašvuođa ja illasteami birra luonddu vuostá. Dáidagiid ja ságastallamiid bokte háliidit čalmmustahttit movt luondduillásteapmi Sámis ja eará álgoálbmotguovlluin váikkuha olbmuid, eallima ja dearvvašvuođa.
Prográmmas leat sáhkavuorut, ságastallamat, ja maiddái dáiddalaš ovdanbuktimat, filmmat, ja girjealmmuheapmi.
Viiddis ja bistevaš ovttasbargu
– Sámediggi atná árvvus buriid čovdosiid go galgá lágidit doaluid otná covid-19 dilis, ja rámida Dáiddadálu go guldalit báikkálaš politihkalaš ávžžuhusaid seammás go doalahit dáiddasuorggi ealasin, dadjá Sámedikki presideantta Aili Keskitalo.
EadnámetMaid lágiduvvo Dáiddadálu bokte, ovttas Sámedikkiin ja Office for Contemporary Art Norway (OCA)ja lea joatka OCA guhkitáiggi áŋgiruššamis Mázes, ikonalaš gilli sámepolitihka oktavuođas, ja OCA barggu ásahit internationála dáiddárresideansa álgoálbmotdáiddáriidda.
– OCA atná árvvus ovttasbarggu Dáiddadáluin ja Sámedikkiin, ja rámida Dáiddadálu go gávdnet čovdosiid movt lágidit deaivvademiid dáiddáriidda hásttuheaddji áiggis. OCA váldobargu lea čatnat Norgga ja Sámi máilbmái, ja nuppe guvlui. Min bargu lea maid oažžut máilmmi geahčestit dehálaš, muhto unnán fuomašuvvon osiide Norgga ja Sámi dáiddáhistorjjas, vai dat oaččoše saji riikavidosaš dáiddaárenai. “EadnámetMaid” prošeavttas bargat erenoamažit dan ala ahte ásahit internašunála álgoálbmot dáiddárresideanssa Mázii. Dán barggus leat máŋga oasi, okta dain lea divuhit Sámi Dáiddajoavku/Mázejoavku ateliera, dáiddajoavku geat serve vuosttaš luonddugáhtten- ja álgoálbmot lihkkadussii, nammalassii Álttá ákšuvdnii, ja geat maŋŋel begge go golbma dáiddára sin gaskkas čajehedje dáidágiidis beakkán Documenta 14 2017s.
Mii sávvat addit sin bargui stuorát fuomášumi álgoálbmot-, davviriikalaš ja internátionala dáiddahistorjjas, Máze historjjas ja dáiddalaš bargguide Mázes, ja addit ođđa dáiddár buolvvaide vejolašvuođa čatnasit dán historjii boahtteáigásaš dáiddárresideanssa bokte. OCA almmuhii gieskat ahte sámi dáiddárat Pauliina Feodoroff, Máret Ánne Sara ja Anders Sunna, leat válljejuvvon davviriikalaš paviljongai mii dál šadda sámi paviljongan go Veneziabiennalen lágiduvvo 59. háve 2022:as. Danne lea deŧálaš árvvus atnit daid bálgáid maid Mázejoavku leat vázzán boahttevaš dáiddáriidda, maiddái dán golbmasii, dadjá Office for Contemporary Art Norway direktevra, Katya García-Antón.
EadnámetMaid lea ožžon doarjagiid Sámedikkis, OCA (Office for Contemporary Art Norway), Norsk Kulturråd, Nordisk Kulturfond, Fritt Ord, KORO (Kunst i offentlig rom), Nordnorsk Kunstnersenter ja Troms og Finnmark Fylkeskommune.
