Kamilla Triumf: Sámi Popart
Skilleduorastaga, 1.4.21, rahpá Dáiddadállu beassáščájáhusa dáiddárguimmiin Kamilla Marie Triumfain. Čájáhus: Sámi popart by Kamilla Triumf lea Kamilla vuosttaš čájáhus Guovdageainnus ja čájáhus lea ovttasbargu Sámi beassášfestiválain ja Guovdageainnu Gilišiljuin.
– Čájáhusas čajehan sámi popart:a. Doppe leat sihke málejuvvon govat ja digitála illustrašuvnnat. Govain leat olu ivnnit, ja motiivain leat sámi elementat. Mu dáidagiid sáhttá maid dulkot dainna lágiin ahte dat norbmaid hástalit, muitala Triumf.
Loktejit ođđá dáiddára
Kamilla Marie Triumf lea háhkan dáiddalaš máhtu Kárášjoga dáiddáskuvllas. Gieskat mearridii ahte áigu bargagoahtit duođalaččat dáidagiin ja leage danne ohcan dáiddárguoibmin Dáiddadállui. Dáiddadállu bargá ovdánahttit dáiddáriid ja loktet sin dáidaga oidnosii. – Danne leatge hui ilus dál lágiidit Kamilla vuosttaš čájáhusa ruovttubáikkistis Guovdageainnus, dadjá Dine.
Speadjalastá ođđá áiggi sámis
Popart-dáiddár háliida čalmmustahttitt ahte sámi dáidda čuovvu servodaga ovdaneami ja ođasmahttima. “Art in modern pathways” leage namma čájáhusas ja dainna čájeha son sámi áiggi ođđa hámis dáidagis bokte.
-Mun sávan ahte čájáhus movttidahttá ja geasuha olbmuid, earenoamožiid nuoraid. Čájáhusas lea maid vejolaš oastit mu dáidagiid, dadjá Kamilla.
Dáiddadálu beaivválaš jođiheaddji, Dine Arnannguaq Fenger Lynge, illuda rahpat čájáhusa.
– Rámisvuođain illudit čajehit min ođđa, čeahpes dáiddára ja su dáidagiid. Kamilla lea miellegiddevaš dáiddár, seamma go su dáidagat, ja jáhkan ge ahte son oláha viidát iežas bargguin, muitala Lynge.
Čuldet ovttasbarggu
Dáiddadállu lea ovttasbargan Sámi beassášfestiválain 2019 rájes, ja mannan jagi álggahii bistevaš ovttasbarggu Guovdageainnu Gilišiljuin.
– Mii leat duhtavaččat buori ovttasbargguin báikkálaš ásahusaiguin. Go bidjat fámuid oktii, šaddá álkit lihkostuvvat ja dáinna lágiin olahat guhkelii, dadjá Lynge.
“Sámi popart by Kamilla Triumf” rahpasa seammás go beassášfestivála, skilleduorastaga diibmu 14:00 Gilišiljus. Čájáhus lea Gilišilju dološ internáhtas ja bistá 23.5.21 rádjái.
Mii váldit ovddasvástádusamet álbmogassii duođalaččat vai unnošii covid-19 njoammun ja mii dáhttut min gussiid čuovvolit. Mis leat njoammunseastádannjuolggádusat čájáhusas ja mii čuovvut báikkálaš ja nášunála ávžžuhusaid. Geahččit sáhttet lohkat covid-dili birra Guovdageainnu suohkana neahttasiidduin. Earenoamožiid ávžžuhit sin guhte mátkoštit Guovdageidnui čuovvut báikkálaš ja nášunála ávžžuhusaid mátkošteddjiide.
