![Guovzza vuossat Utvalgte foto Aslak Mikal Mienna 00020 2048x1366](https://daiddadallu.imgix.net/Guovzza-vuossat-Utvalgte-foto-Aslak-Mikal-Mienna-00020-2048x1366.jpg?auto=compress%2Cformat&crop=focalpoint&fit=crop&fm=webp&fp-x=0.5&fp-y=0.5&h=400&transformer=imgix&w=600)
Vuosttaščájáhus: Vuoššat Guovžža
Sámi Našunálateáhter Beaivváš ávvuda 40 jagi dán jagi! Min dáiddárguoimmit Rawdna Carita Eira, Roger Ludvigsen ja Anitta Suikkari barget Beaivvážis ja leat dáid beivviid rahkaneame “Vuoššat Guovžža” čájálmassii mas lea vuosttaščájáhus bearjadaga 5.3. Guovdageainnus. Mii leat humadan Rawdna Caritain guhte lea čajalmasa inspisienta.
![Unnamed 2 2048x1536](https://daiddadallu.imgix.net/unnamed-2-2048x1536.jpg?auto=compress%2Cformat&crop=focalpoint&fit=crop&fm=webp&fp-x=0.5&fp-y=0.5&h=450&transformer=imgix&w=600)
Dáiddárguoimmit Rawdna Carita Eira ja Anitta Suikkari.
Muitalastte čajalmasa birra.
Vuoššat Guovžža lea krim- ja ráhkisvuođamuitalus mii dáhpahuvvo 1850-logus Pajalas. Báhppa Læstadius eamidin Britta Kasja leaba váldán sámeluntta Jussi iežaska gehččui. Sunno biigá Maria lea Jussi ráhkisvuohta, muhto son ii ipmirduvvo ja measta cábmahalla. Fáhkkestaga láhppojit ja gottahallot nissonolbmot Pajalas. Servodat lea gávnnahan ahte guovža lea sivalaš, muhto báhppa ja Jussi eaba jáhke dasa. Soai ballaba ahte lea olmmošgoddi, ja ahte áigu váldit Maria, muhto gii lea dat olmmošgoddi? Mikael Niemi dadjá ahte muitalus lea Jussi, Maria ja goddi birra, ja lea inspirerejuvvon Lars Levi Læstadiusa eallimis (vaikko goddemuitalus lea fearán).
Vuosttaščájáhus lahkona. Movt dovdo?
Dovdu lea hui buorre! Mis leat leamašan earenoamaš buori geahččaleamit Gilišiljus. Guovssahas libarda (jáhkan guovssahas liiko Rogera musihkkii :D), mánoheahpi ja bivvalis dálki. Mis nu lihkku go sáhttit olgun bargat ovdalii go bissehit buot doaimmaid. Ja mis lea máilmmi buoremus bargojoavku!
Makkár barggut dis leat čajalmasas?
Mun lean inspisient – mii mearkkaša ahte mun čuvvolan buot plánaid geahččalemiid ektui, infrastruktuvrra ja váruhan ahte buohkat dihtet gos ain galget leat. Mun veahkehan teknihkajoavkku, diehtojuohkin joavkku, čuvvolan bivttasjoavkku vai buot biktasat leat sajis, gáfe vuoššan ja ordnen snacksaid bottuide. Lea deŧalaš go bargat olgun. Sáhttá dadjat ahte lean buohkaid biigá ja buohkaid áhkku.
Roger buvttada musihka ja sus lea čajalmasa musikálska jietnagova ovddasvástadus. Anitta lea okta dain muitaleddjiin lávddis, ja neaktá golbma rolla: Kristina, eadni niidii guhte veagálváldui, reanga HeinoElina Mukko – eará nissonolmmoš.
![Unnamed 4 2048x1536](https://daiddadallu.imgix.net/unnamed-4-2048x1536.jpg?auto=compress%2Cformat&crop=focalpoint&fit=crop&fm=webp&fp-x=0.5&fp-y=0.5&h=450&transformer=imgix&w=600)
Dá fas Rawdna Carita Eira ja dáiddárguoibmi Roger Ludvigsen.
Dii lehpet álgán geahččalemiiguin olgolávddis. Movt lea mannan?
Mun lean váruhan ahte váldit bottožiid vai olbmot eai galbmo, mii šaddat goikadit lávdebiktasiid juohke eahkeda ja lea dieđus eanet bargu go šadda viežžat ja doalvut diŋggaid Gilišiljus. Mis lea 20 galbmaceahki buolašrádjin, mii dagaha ahte šaddat čuovvut dálkedieđáhusa ja mii mihtidit temperatuvrra ja biekka bargosajis. Dán rádjái gal lea bures mannan. Mii han leat olgun, ja danne šaddatge luonddu mielde bargat. Dasa lassin leat guovdu márkana, mii buktá iešguđetlágan jienaid, ii leat nu jaska go teatervistis. Muhto mu mielas gal doaibmá bures Gilišiljus, ja lea somá bargat daid boares vistiid gaskkas!
Mii Dáiddadálus illudit ja sávvat lihkku čajalmasain! Vuosttaščájáhussii eai leat šat bileahtat vuovdemassii, muhto eará čájáhusbeivviide gal leat bileahtat fidnemis. Dáppe gávnnat bileahtaid: http://beaivvas.no
Vuoššat Guovžža – Koke Bjørn:
Čálli/: Mikael Niemi
Giehtačálus& Bagadalli: Leif Stinnerbom
Bivttashábmejeaddji: Inger Stinnerbom
Lávdehábmejeaddji: Ole Thomas D. Nilut
Šuokŋadahkki & Čuojaheadadji: Roger Ludvigsen
Luohtedahkki & Juoigi: Iŋgor Ántte Áilu Gaup
Koreográfa ja bagadalliveahkki: Jimmy Meurling
Čuovgahábmejeaddji: Øystein Heitmann, Hålogaland teater
Jorgalan sámegillii: Britt-Inga Vars
Neavttárat: Nils Henrik Buljo, Emil Karlsen, Mary Sarre, Marte Fjellheim Sarre, Iŋgor Ántte Áilu Gaup, Paul Ottar Haga, Eila Ballovara Varsi, Jakob Hultcrantz, Egil Keskitalo, Anitta Suikkari