Sámi dáidaga čalmmustahttin internášunála arenas

Project type Buvtta ovdánahttin

Sámi dáidagii lea erenoamáš beroštupmi sihke regionála, nášunála ja internášunála dásis. Dáiddadálu dáiddárat buvttadit alla dási dáidagiid, mat dárbbašit čájehuvvot viidábut. Dát bovttii sáhkkivuođa geahččalit ođđa vugiid, mat sáhttet nanusmahttit dáiddáriid čalmmustahttima.

Sosiála media lea gelddolaš suorgi mii čađat ovdána ja mainna olaha viidát. Dáiddadállu áiccai dáiddárguimmiid gaskkas oktasaš hástalusa go galget sihke bargat iežaset dáidagiin ja seammás fuolahit jearu, vuovdima ja márkanastima. Dán prošeavtta ulbmil lea ge lasihit dáiddáriid oinnolašvuođa viidát ja nu maid eanedit čájehanvejolašvuođaid, ovttasbargguid ja eará bargguid.

Sosiála media lea suorgi mii jođánit rievdá. Prošeakta čiekŋudii sosiála media oahpahallamii, sihke geavatlaččat ja fágalaččat. Dát reaidu lea erenoamáš dárbbašlaš Dáiddadállui mii lea guhkkin eret oaivegávpogiin. Danin lea maid leamaš dehálaš ovdánahttit Dáiddadálu ja dáiddáriid beaggima dán suorggis.